हुम्ला – कोहलपुर–सुर्खेत १३२ केभी विद्युत् प्रसारण लाइन विस्तारमा लामो समयदेखि देखिएको विवाद सुल्झिएको छ, जसले गर्दा आयोजना अघि बढाउने बाटो खुलेको छ। तीन तहकै सरकारको प्राथमिकतामा यो विद्युत् विस्तार योजना परेसँगै आयोजनाको अवरोध हटेको र निर्माण कार्यले गति लिएको आयोजना प्रमुख रवि चौधरीले जानकारी दिए।
विवाद समाधान र प्रगति: बैजनाथ गाउँपालिकाको वडा नं. १ गाभर र वडा नं. ४ को बानियाँभार हुँदै लाइन विस्तार गर्दा बस्ती र खेतीयोग्य जमिनमा असर पुग्ने भन्दै स्थानीयले विरोध जनाउँदै आएका थिए। तर, विवाद समाधान भएसँगै उक्त बस्तीमा तीन वटा टावर निर्माण गरिनेछ भने ३० घरपरिवार प्रभावित हुनेछन्। अबको छ महिनामा काम सक्ने गरी योजना निर्माण गरिएको छ।
यस्तै, वीरेन्द्रनगर नगरपालिका–११, सुब्बाकुनामा पनि विवाद सुल्झिएको छ। उक्त स्थानका स्थानीयले पनि काममा अवरोध गर्दै आएका थिए। आयोजनाबाट उक्त वडाका १८ घरपरिवारको जग्गा प्रभावित हुनेछ। सरकारले वार्तामार्फत सहमति नभए बल प्रयोग गरेर आयोजना अघि बढाउने भनेपछि स्थानीय पनि सहमतिमा आएका हुन्। वडा नं. ११ सुब्बाकुनामा भने केही दिनमा काम सुरु गरिने आयोजनाले जनाएको छ।
२०७७ असारदेखि सुरु भएको यस लाइन विस्तार कार्यको हालसम्म ९५ प्रतिशत प्रगति हासिल भएको छ। अब मात्र पाँच प्रतिशत काम गर्न बाँकी छ। जग्गा र वनका कारण आयोजनाले तोकिएकै मितिमा कामसमेत गर्न सकेको थिएन। अहिले भने विवाद समाधान भएसँगै बाँकी ठाउँमा काम अघि बढाइएको छ।
भारतीय निर्माण कम्पनी आरएस इन्फ्राप्रोजेक्ट प्रालिले ७० करोड रुपियाँमा आयोजनाको ठेक्का पाएको हो। रुख कटानको काम धमाधम भइरहेको छ, जसअन्तर्गत अहिलेसम्म करिब पाँच हजार रुख काटिएको छ।
आयोजनाका लागि कुल १६२ वटा फाउन्डेसन निर्माण गरिनेछ, जसमध्ये १५६ वटा निर्माण भइसकेका छन् र बाँकी छ वटा फाउन्डेसन निर्माणको काम विवाद समाधान भएसँगै अघि बढाइएको छ। यस्तै, कुल ५२ किलोमिटर तार तानिनेछ, जसमध्ये हालसम्म ४० किलोमिटर तार तान्ने काम सकिएको छ।
