- किसानहरू अनुदानको रासायनिक मलको अभाव नभए पनि सहकारीले वितरण प्रक्रिया सहज नबनाउँदा लाइनमा बस्न बाध्य छन्।
- कृषि सामाग्री कम्पनी लिमिटेडले प्रदेश सरकारद्वारा निर्धारण गरिएको कोटाको आधारमा मल वितरण गर्दै आएको छ।
- हाल लमहीमा यूरिया २१७.२५ मेट्रिटन, डिएपी ४३.५ मेट्रिकटन, पोटास ३६.१ मेट्रिकटन उपलब्ध छन्।
दाङ- प्रिया चौधरीले झण्डै एक विगाह जग्गामा मकै खेती गरेकी छन् । मकैका लागि रासायनिक मल चाहिने । प्रिया बिहान ५ बजेबाट सहकारी कार्यालयको अगाडि लाइनमा छिन् । रासायनिक मलको अभाव नभएको कृषि सामाग्री कम्पनीले बताउँदै आए पनि किसान भने अनुदानको रायनिक मलका लागि लाइनमा बस्न बाध्य छिन् ।‘किसानलाई दुःख धेरै छ । लाइन नबसी मल पाइँदैन’ उनले भनिन्,‘बिहान पाँचबजेबाट लाइनमा बसियो । अब पालो कहिले आउने हो?’
बिहान १० बजे कार्यालय खुल्छ । तर, किसान भने घण्टौँ अघिबाट लाइनमा बस्ने गरेका छन् । ‘रासायनिक मल धेरै चाहिन्छ । तर, पाइन्छ थोरै । लाइन नबस्ने हो भने मल नै पाइँदैन’ उनले सुनाइन्,‘दुधे बालबच्चा बोकेर लाइनमा बस्नुपर्ने अवस्था छ ।’
चित्रबहादुर चौधरी पनि लाइनमा छन् । रासायनिक मल लिन उनी लाइनमा बसेका हुन् । ‘गहुँ, मकै छ । त्यसलाई धेरै मल चाहिन्छ । तर, आधा बोरा मात्रै मल दिन्छन्’ उनले भने,‘कहिले होला लाइनमा नबस्नेगरी सजिलै मल पाइने ।’
किसान अनुदानको रासायनिक मलका लागि लाइनमा बस्दै आएका हुन् । कृषि सामाग्री कम्पनी लिमिटेडले प्रदेश सरकारले निर्धारण गरेको कोटाको आधारमा मल वितरण गर्दै आएको हो ।
अहिले रासायनिक मलको अभाव नभए पनि सहकारी संस्थाले वितरण प्रक्रिया सहज नबनाउँदा किसान लाइनमै बस्न बाध्य भएका हुन् । चारवटा स्थानीय तहमा ४८ वटा सहकारी संस्थामार्फत अनुदानको रासायनिक मल वितरण भइरहेको हो ।
लमही नगरपालिकामा १९, गढवा गाउँपालिकामा ११, राप्ती र राजपुरमा ९/९ वटा सहकारी संस्थाले अनुदानको रासायनिक मल वितरण गर्दै आएका छन् ।
अहिले कृषि सामाग्री कम्पनी लमहीमा यूरिया २१७.२५ मेट्रिटन, डिएपी ४३.५ मेट्रिकटन, पोटास ३६.१ मेट्रिकटन, चुन ११.६७ स्टक छ ।
तस्बिरहरू:
