काठमाडौँ–नेकपा (माओवादी केन्द्र) का नेता गिरिराजमणि पोखरेल नेतृत्वको वर्षमान पुन र श्रीराम ढकाल सदस्य रहेको कार्यदलले एकीकरण, धुव्रीकरण र समायोजनमा आएर पार्टीमा जिम्मेवारी नपाएका नेता तथा कार्यकर्ताहरुको अवस्थाबारे तयार पारेको प्रतिवेदन बुझाएको छ।
प्रतिवेदनमा एकतामा आएकाको अवस्था कस्तो छ र उनीहरुलाई कुन स्थान दिने भन्नेबारे विस्तृत व्याख्या गरिएको माओवादीका एक स्थायी कमिटी सदस्यले जानकारी दिए ।
मंगलबार पार्टी केन्द्रीय कार्यलय पेरिसडाँडामा बसेको माओवादी स्थायी कमिटी बैठकमा प्रतिवेदन बुझाइएको हो । बैठकमा आगामी पुसमा हुने राष्ट्रिय सम्मेलनबारे पनि छलफल भएको छ ।
सम्मेलनका लागि २१ सदस्यीय केन्द्रीय निर्वाचन आयोग गठन गरिएको छ। आयोगको प्रमुख यसअघि विष्णुप्रकाश श्रेष्ठलाई तोकिएको थियो ।
आयोगलाई छिट्टै नै निर्वाचन नियमावली, निर्देशिकालगायत बनाउन पनि बैठकले जिम्मेवारी दिएको छ । बैठकमा मन्त्रिपरिषद् विस्तारबारे भने छलफल नभएको ती नेताले बताए ।
