हुम्ला, सिमकोट – सिमकोट गाउँपालिकाको वडा नम्बर ६ मा आधारभूत स्वास्थ्य केन्द्र स्थापना भएको छ । सिमकोट गाउँपालिकाले केही समय अगाडि पालिकाका सबै वडाहरुमा स्वास्थ्य संस्था स्थापना गर्ने निर्णय गरे अनुसार स्वास्थ्य केन्द्रको स्थापना गरेको हो ।
जनतालाई स्वास्थ्य सहज र शुलभ किसिमले प्रदान गर्नका लागि वडा नम्बर ६ को तीन धारामा हाललाई स्थानीय विद्यालयको हातामा रहेको भवनलाई भाडामा लिएर आधारभूत स्वास्थ्य केन्द्र स्थापना गरेर संचालन गरिएको वडा नम्बर ६ का अध्यक्ष जयचन्द्र रोकायाले बताए ।
जनताको घरदैलोमै स्वास्थ्य सेवा पुगेको र अब प्रभाकारी सेवा प्रदानका लागि आफू लाग्ने अध्यक्ष रोकायाले बताए ।
केन्द्रको उद्घाटन गर्दै जिल्ला समन्वय समितिका प्रमुख दानबहादुर रावतले स्वास्थ्य सेवाको पहुँच जनताको घर आगन मै पुुग्नु सकरात्मक कार्य भएको बताए ।
हाललाई दुईजना स्वास्थ्यकर्मीले आधारभूत उपचार र औषधी उपलब्ध गराउने गरी काम सुरु भएको पालिकाका स्वास्थ्य संयोजक ध्रुवकुमार सिंहले बताए ।
केन्द्रको उद्घाटन कार्यक्रममा पालिका अध्यक्ष पदमबहादुर लामा, उपाध्यक्ष बली रावत, जिल्ला अस्पतालका डाक्टर दुर्गा सुर्खाली लगायत स्वास्थ्य स्वयम सेबिकाहरुको उपस्थिति रहेको थियो ।
