दाङ – दाङमा आन्दोलनको स्वरुप परिवर्तन हुने भएको छ । प्रदेश नम्बर पाँचको अस्थायी राजधानी बुटलवलमा तोकिएपछि चार दिन अघिदेखि यहाँ आमहड्ताल जारी थियो ।
शनिबार राति ११ बजेदेखि आमहड्ताल स्थगित हुने तर अन्य विरोधका कार्यक्रम भने जारी राख्ने संयुक्त संघर्ष समितिले जनाएको छ ।
‘सबै प्रकारका आन्दोलन र संघर्ष चलिरहन्छ तर आमहड्ताल भने स्थिगीत गर्ने तयारीमा छौं’ संयुक्त संघर्ष समितिका संयोजक टीकाराम खड्काले भने ‘हामी बैठकमै छौं, आमहड्ताल स्थगित भएको छ ।’
माघ २५ गते राष्ट्रियसभा सदस्यको निर्वाचन दाङमा हुँदैछ । सोही निर्वाचनलाई मध्यनजर गर्दै र सर्वसाधारण नागरिक मारमा परेको भन्दै आम हड्तालको कार्यक्रम स्थगित गर्ने दबाब चारैतिरबाट परेको थियो ।
विरोधसभा, कोणसभा, ज्ञापन पत्र बुझाउने, डेलिगेसन जाने जस्ता अन्य विरोधका कार्यक्रम भने यथावत रहने समितिले जनाएको छ । उद्योग वाणिज्य संघले सुरुमा नेतृत्व गरेको आन्दोलन पति राजनीतिक दललाई सुम्पिएको थियो ।
आन्दोलनको नेतृत्व गरेका दलहरुले अाम हड्ताल स्थगित गर्ने निर्णय गरेका हुन् । अब आइतबारदेखि बजार, कलकारखाना, शिक्षण संस्था, यातायात सबै सञ्चालनमा आउने छन् ।
