विर्तामोड – झापाको विर्तामोडमा रहेको मेची आँखा अस्पतालले बुधबारदेखि आँखाको नानी संकलन गर्ने भएको छ । अन्धोपनलाई न्यूनिकरण गर्नका लागि मृत शरीरबाट आँखाको नानी संकलन गर्ने कार्यक्रम गर्न लागिएको मेची आँखा अस्पतालका निर्देशक डा. पुरुषोत्तम जोशीले बताए ।
अस्पतालमा कार्यरत आँखाको नानी रोग विशेषज्ञहरु डा. विजय भुषाल र डा. अनिका शाहले आँखा नानी संकलन गर्ने कामको नेतृत्व गर्ने अस्पतालका निर्देशक डा. जोशीले जानकारी दिए । संकलन गरिएको आँखाको नानी २४ घन्टाभित्रमा तिलगंगा आँखा अस्पताल काठमाडौंमा रहेको आँखा व्यांकमा पुर्याइने उनले बताए ।
आँखाको नानीमा फुलो परेमा कुनै पनि औषधिले काम नगर्ने र एकमात्र उपाय आँखाको नानी प्रत्यारोपण नै भएको आँखा रोग विशेषज्ञ बताउँछन् । जस्का लागि मानिसको मृत्युपछि आँखाको नानी झिकेर दृष्टिबिहीनलाई प्रदान गरिन्छ ।
अहिलेसम्म मेची आँखा अस्पतालले १ सय ५१ जनाको आँखाको नानीको प्रत्यारोपण गरिसकेको छ । प्रत्यारोपण गर्नुपर्दा तिलगंगा अस्पताल काठमाडौंबाट आँखाको नानी ल्याइने मेची आँखा अस्पतालले जानकारी दिएको छ ।
नेपालमा बर्सेनि १० हजार आँखाको नानीको आवश्यक्ता रहेको आँखाको नानी रोग विशेषज्ञ डा. विजय भुषालले बताए। तर एक हजार मात्र आँखा नानी प्राप्त हुने गरेको उनको भनाई छ । उनले आँखा दानका लागि सबैसंग आग्रहसमेत गरेका छन् ।
