जनकपुरधाम – किर्ते सही गरी झण्डै दुई करोडो रुपैयाँ चोरी गरेका एकजना पक्राउ परेको छ । पक्राउ पर्नेमा महोत्तरी जिल्लाको महोत्तरी गाउँपालिका वडा नं. १ घर भई हाल धनुषाको जनकपुरधाम उपमहानगरपालिका वडा नं. ४ मा बस्दै आएका ४२ वर्षे प्रविण कुमार ठाकुर रहेको धनुषाका प्रहरी प्रवक्ता प्रहरी नायव उपरीक्षक रामेश्वर कार्कीले बताएका छन् ।
उनले किर्ते सही गरी पौने दुई करोड रुपैयाँ चोरी गरी फरार रहेका थिए । आइतबार भारतबाट लुकिछिपी आइरहेको अवस्थमा जिल्ला प्रहरी धनुषाबाट खटेको विशेष टोलीले मुखीयापट्टी मुसहर्निया गाउँपालिका वडा नं. ३ तुलसियाहीमा घेरा हाली पक्राउ गर्न सफल भएको प्रहरी नायव उपरीक्षक कार्कीले बताए ।
ठाकुर प्राविधिक शिक्षा तथा व्यवसायिक तालिम परिषद प्रदेश कार्यालय प्रदेश नं. २ अन्तर्गत संचालित विपी मेमोरियल पोलिटेक्निकल इनस्टिच्युड लक्ष्मीनियमा–४ सपही, धनुषामा करारमा सहायक ल्याव प्रशिक्षक पदमा कार्यरत थिए । उनले विभिन्न समयमा विपी मेमोरीयलबाट कार्यालयको चेकहरु चोरी गरी कार्यालयको लेखापाल सन्तोष कुमार यादवको सही किर्ते गरी छुट्टाछुट्टै बैँकमा ६२ लाख ५६ हजार ९ सय चोरी गरेको आरोप छ ।
यस्तै धनुषा जिल्लामा रहेको प्रदेश कार्यालयमा समेत विभिन्न मितिमा चेक चोरी गरी कार्यालयका लेखापाल ब्रहमदेव ठाकुरको सही किर्ते गरी विभिन्न बैँकबाट १ करोड १५ लाख ४५ हजार झिकी फरार भएको थिए ।
