जनकपुरधाम – धनुषामा चाउचाउ खाएर सुतेकी एक बालिकाको मृत्यु र आमा छोरा बिरामी भएपछि प्रहरीले अनुसन्धान थालेको छ ।
धनुषाधाम नगरपालिका–३ तेजनगर बस्ने सत्रुधन साहकी ६ वर्षीया छोरी काजल साह शुक्रबार साँझ चाउचाउ खाएर सुतेको र सुतेकै अवस्थामा उनको मृत्यु भएको परिवारजनले बताएका छन् ।
काजलसँगै चाउचाउ खाएर सुतेकी बालिकाकी आमा र चार वर्षीय भाई राकेश पनि सिकिस्त बिरामी परेपछि प्रहरीले अनुसन्धान थालेको हो । बिरामी परेका दुवैजनाको उपचार भइरहेको प्रहरी निरीक्षक सुमन थापाले जानकारी दिए ।
शुक्रबार बेलुका उनीहरु चाउचाउ खाएर सुतेका थिए । परिवारका सदस्यले चाउचाउ खाएरै घटना भएको दाबी गरेका बेला पोष्टमार्टम रिपोर्टपछि मात्रै सत्य खुल्ने प्रहरी निरीक्षक थापाले बताए ।
थापाले चाउचाउ खाएकै कारणले काजलको मृत्यु भएको भनेपछि स्थानीय पसलहरुमा भएको सबै चाउचाउ नियन्त्रणमा लिइ परीक्षणकालागि जनकपुर पठाइएको उनले बताए ।
