- झापाको गौरादह नगरपालिकामा चट्याङसहितको आगलागीले एक स्थानीयको घर र गोठ पूर्ण रूपमा नष्ट गर्यो।
- आगलागीबाट ६ वटा चौपायाको मृत्यु र करिब २ लाख ५० हजार रुपैयाँको धनमाल नष्ट भएको प्रहरीले जनाएको छ।
- गौरादह नगरपालिकाको दमकल, स्थानीय प्रहरी र छिमेकीहरूको सहायतामा आगो मात्र १:०० बजे नियन्त्रणमा आयो।
झापा- झापाको गौरादह नगरपालिकामा चट्याङसहित भएको आगलागीबाट एक स्थानीयको घर र गोठ जलेर नष्ट भएको छ। बिहीबार राति परेको चट्याङका कारण गौरादह- ६ धोपा टोल बस्ने ५० वर्षीय अजय कुमार झाको घरमा क्षति पुगेको हो।
गएराति करिब ११:३० बजेको समयमा हावाहुरी र अविरल वर्षासँगै परेको चट्याङ झाले प्रयोग गर्दै आएको टिनको छानो र बाँसको बेरा भएको एकतले भान्साघर तथा गोठमा खसेको थियो।
चट्याङबाट सुरु भएको आगोले भान्साघर र गोठ पूर्ण रूपमा नष्ट गरेको छ। सोही आगलागीमा परी गोठमा रहेका २ वटा माउ बाख्रा र ४ वटा पाठा गरी ६ वटा चौपायाको जलेर मृत्यु भएको छ।
आगलागीबाट मानवीय क्षति भने नभएको प्रहरीले जनाएको छ। प्रहरीको प्रारम्भिक अनुमान अनुसार चौपाया र अन्नपातसहित गरी करिब २ लाख ५० हजार रुपैयाँ बराबरको धनमाल पूर्ण रूपमा जलेर नष्ट भएको छ।
घटनाको जानकारी पाएलगत्तै गौरादह नगरपालिकाको दमकल, स्थानीय प्रहरी र छिमेकीहरूको सक्रियतामा आगो निभाउने कार्य सुरु गरिएको थियो।
सबैको सामूहिक प्रयासपछि बिहानको राति १:०० बजे आगो पूर्ण रूपमा नियन्त्रणमा आएको थियो।
समयमै आगो नियन्त्रण भएकाले थप छिमेकी बस्तीमा क्षति हुनबाट जोगिएको स्थानीयले बताएका छन्।
