- स्वास्थ्य मन्त्री डा. सुधा गौतमले कर्णाली र सुदूरपश्चिमलाई आयुर्वेद औषधिको अनुसन्धान केन्द्रका रूपमा विकास गर्नुपर्ने बताइन्।
- एलोपेथिक औषधिको उत्पादन पूर्वी नेपालमा केन्द्रित रहेकाले आयुर्वेदलाई पश्चिम नेपालमा विस्तार गर्नुपर्ने धारणा राखिन्।
- नेपाल आयुर्वेद, भेटेरिनरी र श्रृङ्गार प्रसाधन क्षेत्रमा सम्भावना रहेको भन्दै अनुसन्धानमा लगानी बढाउन आग्रह गरिन्।
काठमाडौँ- स्वास्थ्य तथा जनसंख्यामन्त्री डा. सुधा गौतमले नेपालको कर्णाली र सुदूरपश्चिम प्रदेशलाई आयुर्वेद औषधिको अनुसन्धान र उत्पादन केन्द्रका रूपमा विकास गर्नुपर्ने बताएकी छन्।
नेपालका हिमाली तथा उच्च पहाडी भेगमा पाइने बहुमूल्य जडीबुटीको सदुपयोग गर्दै आयुर्वेद औषधि उत्पादनमा देशलाई आत्मनिर्भर बनाउने सरकारको दीर्घकालीन सोच रहेको उनले प्रस्ट पारिन्।
फार्मा एक्स्पोमा उपस्थित विभिन्न क्षेत्रका उद्योगी व्यवसायीहरूलाई सम्बोधन गर्दै मन्त्री गौतमले एलोपेथिक (आधुनिक) औषधिको उत्पादन मध्य र पूर्वी नेपालमा केन्द्रित रहेकाले अब आयुर्वेदलाई पश्चिम नेपालमा विस्तार गर्नुपर्ने धारणा राखिन्। यसो गर्न सकेमा देशको सन्तुलित विकास हुने र नेपाललाई आवश्यक पर्ने सबै प्रकारका औषधिहरू स्वदेशमै उत्पादन हुने उनको भनाइ छ।
हालै जुम्लाको भ्रमण गरेर फर्किएकी मन्त्री गौतमले भनिन्, ‘हाम्रो जडीबुटी सबै हिमालमा छ। जुम्लास्थित मेडिकल कलेज र इन्स्टिच्युटहरूमा आयुर्वेदिक तर्फको अनुसन्धान र खोजलाई तीव्रता दिनुपर्छ। अहिले हाम्रा धेरैजसो औषधि उद्योग र प्रयोगशालाहरू बारा, पर्सा र गण्डकी प्रदेशमा केन्द्रित छन्। अब आयुर्वेदिक उत्पादनलाई पश्चिम, सुदूरपश्चिम र कर्णालीतिर विस्तार गर्नुपर्छ। यता आधुनिक औषधि बन्छ, उता आयुर्वेदिक औषधि बन्छ। अनि हामीलाई चाहिने सबै कुरा हामीले यहीँ पाउँछौँ। नेपालको यो भविष्यको चित्र मेरो आँखामा बत्ती बले जसरी बलिरहेको छ।’
नेपालको आयुर्वेद, भेटेरिनरी र श्रृङ्गार प्रसाधनका क्षेत्रमा पनि राम्रो सम्भावना रहेको भन्दै मन्त्री गौतमले यस क्षेत्रका उद्योगीहरूलाई अनुसन्धानमा लगानी बढाउन र स्थानीय कच्चा पदार्थको अधिकतम उपयोग गर्न आग्रह गरिन्। सबैले एउटै दृष्टिकोण बनाएर काम गरेमा नेपाल छिट्टै औषधि र जडीबुटीको क्षेत्रमा विश्वमै चिनिने उनले विश्वास व्यक्त गरिन्।
