- तत्कालीन प्रधानमन्त्री केपी शर्मा ओलीले आयोगलाई लिखित प्रश्नावलीको माध्यमबाट आफ्नो बयान दिएका छन्।
- भदौ २३ र २४ गतेको जेनजी आन्दोलनका क्रममा सुरक्षाकर्मीबाट १९ जनाको हत्या भएको थियो।
- ओलीले सार्वजनिक रुपमा घटना जिम्मेवारी अस्वीकार गर्दै छानबिन आयोगको औचित्यमा प्रश्न उठाएका छन्।
काठमाडौँ – भदौ २३ र २४ गतेको घटनाका सम्बन्धमा जाँचबुझ गर्न गठित आयोग समक्ष तत्कालीन प्रधानमन्त्री केपी शर्मा ओलीले बयान दिएका छन्।
छानबिनको काम अन्तिम चरणमा पुर्याए पनि ओलीको बयानका कारण आयोगले औपचारिक रुपमा काम सक्न पाएको थिएन।
पूर्वन्यायाधीश गौरीबहादुर कार्की नेतृत्वको जाँचबुझ आयोग स्रोतका अनुसार एक सहसचिव ओलीको गुण्डुस्थित निवासमै पुगेर बयान लिएका हुन्। ओलीसँग आयोगले लिखित रुपमा प्रश्नावली तयार पारेर बयान लिएको हो। स्रोतले भन्यो, ‘सहसचिव जानुभएको थियो। लिखित रुपमा उहाँको बयान प्राप्त भइसकेको छ।’
भदौ २३ र २४ गते जेनजी आन्दोलन हुँदा केपी ओली प्रधानमन्त्री थिए।
आन्दोलनको पहिलो दिनमै बानेश्वरमा १७ र सुनसरीमा २ जना गरी १९ जना युवाको सुरक्षाकर्मीबाट हत्या भएको थियो। त्यसको विरोधमा भोलिपल्ट भएको आन्दोलनका कारण राष्ट्रपति निवास शितल निवास, कार्यपालिका, न्यायपालिका र व्यवस्थापिकाको मुख्य भवनसहित प्रहरी कार्यालयहरु ध्वस्त पारिएको थियो। आन्दोलनकारी बालुवाटारमै प्रवेश गरेपछि राजीनामा दिएर ओली सेनाको हेलिकोप्टरमार्फत भागेका थिए।
सार्वजनिक रुपमा घटनामा जिम्मेवारी नलिने र आयोग समक्ष बयान नदिने अडान राख्दै आएका ओलीले लिखित जवाफ दिएका हुन्। उनले जवाफमा के के भनेका छन् भन्ने कुरा आयोग स्रोतले खुलाउन चाहेन।
तर ओलीले छानबिन आयोगको औचित्य नभएको र तत्काल विघटन गर्नुपर्ने जस्ता चर्का अभिव्यक्ति दिँदै आएका छन्।
यसअघि आयोगले तत्कालीन गृहमन्त्री गृहमन्त्री रमेश लेखकसँग पनि बयान लिइसकेको छ। आयोगले तत्कालीन सुरक्षा प्रमुख तथा अरु जिम्मेवार पदाधिकारीहरुसँग पनि बयान लिएको छ। आयोगको म्याद माघ ९ गतेसम्म रहेको छ। पुस ९ गतेसम्म म्याद रहेको आयोगले ओलीको बयानकै लागि एक महिना थपेको थियो।
