मोरङ- नेकपा एमाले मोरङ जिल्ला कमिटीले पार्टी अध्यक्ष तथा पूर्वप्रधानमन्त्री केपी शर्मा ओलीको पक्राउकोविरुद्धमा प्रदर्शन गरेको छ ।
विराटनगरस्थित जिल्ला प्रशासन कार्यालय मोरङमार्फत जिल्ला कमिटीले प्रधानमन्त्रीसमक्ष विरोध पत्रसमेत पठाएको छ ।
जिल्लाका कार्यवाहक अध्यक्ष सागर थापाले सरकारले शनिबार बिहानै गरेको गतिविधिलाई प्रतिशोधपूर्ण र असंवैधानिक कदम भएको आरोप लगाएका छन् ।
विरोध-पत्रमा जाँचबुझ आयोगको प्रतिवेदन कार्यान्वयनका नाममा गरिएको पक्राउलाई लोकतान्त्रिक मूल्यविपरीत भएको कार्यवाहक अध्यक्ष थापाले बताएका छन् ।
पार्टी अध्यक्ष शर्मालाई तत्काल रिहाइ गरिनुपर्ने बताउँदै उनले प्रतिवेदन सार्वजनिक नभइ अध्ययन नगरी कार्वाहीको प्रक्रियाअघि बढाउनुले राजनीतिक प्रतिशोध साध्ने काम भएको बताए ।
विरोध पत्रमा भदौ २३ गते भएको आन्दोलनका क्रममा भएका विभिन्न हिंसात्मक घटनाहरू-सरकारी संरचनामा तोडफोड, आगजनी, लुटपाट, प्रहरीमाथि आक्रमणलगायतका विषयमा आयोगको प्रतिवेदन मौन रहेको बताइएको छ।
एमाले मोरङले पार्टी अध्यक्ष ओलीसहित पक्राउ परेका नेताहरूलाई तत्काल रिहा गर्न माग गरेको छ।
तस्बिरहरू:
