उदाउँदै गरेको सूर्यलाई अर्घ्य दिएसँगै चैते छठ पर्व सम्पन्न

जनकपुरधाम- मिथिलाञ्चल क्षेत्रमा चैते छठ पर्वको अन्तिम दिन आज उदाउँदै गरेको सूर्यलाई अर्घ्य दिएसँगै छठ पर्व सम्पन्न भएको छ ।

बुधबार बिहान ब्रतालुहरूले पानीमा उभेर उदाउँदै गरेको सूर्यलाई अर्घ दिएका हुन् ।

आइतबारदेखि विधिवत रूपमा सुरु भएको छठको पहिलो दिन ‘नहाय खाए’ गरिएको थियो ।

छठको दोस्रो दिन सोमबार दिनभर उपवास बसी राति खीर बनाइ देउतालाई चढाएर ब्रतालुहरू खरना गरेका थिए ।

त्यस्तै, छठको मूल दिन मंगलबार अस्ताउँदै गरेको सूर्यलाई अर्घ दिइएको थियो भने आज उदाउँदै गरेको सूर्यलाई अर्घ दिइ छठ पर्वको विधिवत् रूपमा समापन गरिएको छ ।