- सोमबार नेपाली बजारमा सुनको मूल्य प्रतितोला ६ हजार ५ सय रुपैयाँले घटेर २ लाख ७५ हजार ५ सय रुपैयाँ पुगेको छ।
- अन्तर्राष्ट्रिय बजारमा तेलको मूल्य वृद्धि र डलरको माग बढ्दा सुनको भाउमा दबाब परेको छ।
- विश्वव्यापी महँगीसँगै ब्याजदर पनि बढ्न सक्ने दबाबले सुनचाँदीको मूल्य घट्न सघाएको देखिन्छ।
काठमाडौँ- साताको दोस्रो कारोबार दिन सोमबार नेपाली बजारमा सुनको मूल्यमा उल्लेखनीय गिरावट आएको छ।
नेपाल सुनचाँदी व्यवसायी महासंघका अनुसार यस दिन सुनको भाउ प्रतितोला ६ हजार ५ सय रुपैयाँले घटेर २ लाख ७५ हजार ५ सय रुपैयाँ कायम भएको छ। अघिल्लो दिन पनि सुनको मूल्य १२ हजार ५ सय रुपैयाँले घटेको थियो।
यसरी हेर्दा, एक साताको अवधिमा सुनको मूल्य कुल ३४ हजार रुपैयाँले घटिसकेको छ। गत सोमबार सुन प्रतितोला ३ लाख ९ हजार ५ सय रुपैयाँमा कारोबार भएको थियो भने हालसम्मकै उच्च मूल्य माघ १५ गते ३ लाख ३९ हजार ३ सय रुपैयाँ पुगेको थियो।
अन्तर्राष्ट्रिय बजारका कारण पनि सुनको भाउमा दबाब परेको देखिन्छ। पश्चिम एसियामा बढ्दो द्वन्द्वका कारण तेलको मूल्य वृद्धि भएको छ, जसले अमेरिकी डलरको माग बढाएको छ। विभिन्न देशहरूले डलरको जोहो गर्न सुन बिक्री बढाउँदा सुनको मूल्य घट्न पुगेको अन्तर्राष्ट्रिय सञ्चार माध्यमले उल्लेख गरेका छन्।
त्यस्तै, विश्वव्यापी रूपमा महँगी बढ्दै जाँदा ब्याजदर वृद्धि हुने दबाब पनि देखिएको छ, जसले सुन तथा चाँदीजस्ता बहुमूल्य धातुको मूल्यलाई थप प्रभावित बनाएको छ।
यता, सोमबार चाँदीको मूल्य पनि घटेको छ। अघिल्लो दिन प्रतितोला ४ हजार ५४० रुपैयाँमा कारोबार भएको चाँदी ११५ रुपैयाँले घटेर ४ हजार ४२५ रुपैयाँमा झरेको छ।
