विराटनगर- मोरङको लेटाङ नगरपालिकामा विगत २४ घण्टामा भारी वर्षा भएको छ ।
जल तथा मौसम विज्ञान विभागद्वारा शनिबार ८ बजे गरिएको मापन अनुसार गएको २४ घण्टामा कोशी प्रदेशभरि मोरङमा सबैभन्दा बढी ६१ दशमलव ६ मिलिमिटर वर्षा मापन गरिएको हो ।
विभागले प्रिमनसुनको पूर्वसन्ध्यामा शुक्रबार र शनिबार अधिक हावाहुरीसँगै वर्षा हुने जनाएको थियो । सोही क्रममा शुक्रबार राति हावाहुरीसँगै लेटाङमा अधिक वर्षा मापन गरिएको हो ।
वर्षासँगै गएको बाढी, हावाहुरी र चट्याङका कारण कोशी प्रदेशका विभिन्न जिल्लामा जनजीवन प्रभावित भएको छ । सङ्खुवासभाको नुममा ४१ दशमलव ६ मिलिमिटर वर्षा भएको विभागले जनाएको छ भने प्रदेश राजधानी विराटनगरमा १८ दशमलव ४ मिलिमिटर वर्षा भएको उल्लेख गरिएको छ ।
झापाको कन्काई क्षेत्रमा ३९ मिलिमिटर, दमकमा ३३ दशमलव ६ मिलिमिटर, मोरङको हरैंचामा ३८ दशमलव ६ मिलिमिटर वर्षा मापन गरिएको छ ।
मुख्यगरी पहाडी क्षेत्रमा सडक अवरुद्ध हुने, विद्युत आपूर्ति अवरुद्ध हुने तथा सञ्चार सेवामा समस्या देखिएका छन् ।
