मोरङ – रंगेलीबाट पहिलोपटक आमाको नामबाट नागरिकता वितरण गरिएको छ। जिल्ला प्रशासन कार्यालय मोरङका अनुसार रंगेलीस्थित इलाका प्रशासन कार्यालयमार्फत पहिलोपटक आमाको नामबाट नागरिकता वितरण गरिएको हो।
यसका लागि मोरङका प्रमुख जिल्ला अधिकारी युवराज कट्टेल रंगेलीस्थित कार्यालय पुगेका थिए। नागरिकता वितरण गर्दै प्रजिअ कट्टेलले सेवाग्राहीको सहजता र सुलभ तरिकाबाट सेवादिनका लागि रंगेलीबाटै आमाको नामबाट नागरिकता वितरण सुरु गरिएको बताएका छन्।
आमाको नामबाट नागरिकता लिन विराटनगर आइपुग्नुपर्ने बाध्यता अन्त्य गर्न रंगेलीमा काम सुरु गरिएको उनले बताए। इलाका प्रशासन कार्यालय रङ्गेलीका अनुसार रंगेली नगरपालिका–६ का कपिल कर्मकार र विदुर कर्मकारले आमाको नामबाट नागरिकता लिएका हुन्।
बुवाको निधन भइसकेको अवस्थामा उनीहरुले मामा फुलोदेवी मिस्त्रीको नामबाट नागरिकता लिएको कार्यालयले जनाएको छ। कार्यालयका अनुसार आमाको नामबाट नागरिकता लिनका लागि रंगेलीबाट २१ जनाको आवेदन स्वीकृत भइसकेको छ। प्रमुख जिल्ला अधिकारी कट्टेलले स्वीकृति दिइसकेको बताउँदै इलाका प्रशासन कार्यालय रङ्गेलीका प्रमुख रोशन अधिकारीले सबैलाई नागरिकता वितरण गर्ने जानकारी दिए।
