- सिटिजन्स बैंकमा ४ करोड ९१ लाख रुपैयाँको हिनामिनामा आरोपित रोजी कँडेलले बैंकका प्रमुखहरूमाथि मुद्दा दायर गरिन्।
- बैंकले रोजी कँडेललाई बर्खास्त गरेको र अन्य चार कर्मचारीलाई निलम्बन गरेको छ भने मुद्दा अदालतमा विचाराधीन छ।
- रोजीले दोष स्वीकार्दै ससुरा खगेन्द्रप्रसाद रिजालको नाममा रहेको १ बिघा १२ कट्ठा ६ धुर जग्गा रोक्का राखेकी छिन्।
विराटनगर — सिटिजन्स बैंक इन्टरनेसनल लिमिटेडको विराटनगरस्थित शाखामा भएको करिब ४ करोड ९१ लाख रुपैयाँ आर्थिक हिनामिनाको विषयलाई लिएर नयाँ मोड आएको छ ।
बैंकले हिनामिनामा संलग्न रहेको आरोप लगाएकी कर्मचारी रोजी कँडेलले उल्टै बैंकका केन्द्रीय तथा क्षेत्रीय प्रमुखहरूविरुद्ध उच्च अदालत विराटनगरमा मुद्दा दायर गरेकी छिन् ।
उनले बैंकका केन्द्रीय प्रमुख गणेशराज पोखरेल, कोशी प्रदेश प्रमुख दिवस सिंह ठकुरी र शाखा प्रबन्धक अभिषेक अग्रवालविरुद्ध मुद्दा हालेकी हुन् ।
रोजीका पिता राजन कँडेलका अनुसार, बैंकमा काम गर्ने क्रममा गल्ती भएको स्वीकार गर्दै हिनामिना भएको रकम बराबरको घरजग्गा बैंकको नाममा रोक्का राखिसक्दा पनि बैंकले मानसिक तनाव दिएको छ ।
बैंकले सुरुमा घटना गुपचुप राख्ने र जेथा असुल गरेपछि प्रहरीमा नबुझाउने सहमति गरेको भए पनि अहिले प्रहरी पठाएर थुन्ने धम्की दिइरहेको कँडेल परिवारको दाबी छ । रोजीले आफूलाई पहिले नै तयार पारिएको कागजमा जबरजस्ती सहीछाप गराएको आरोप समेत लगाएकी छिन् ।
यस प्रकरणमा संलग्नताको आरोप लागेपछि बैंकले रोजी कँडेललाई सेवाबाट बर्खास्त गरिसकेको छ । त्यस्तै, शाखा प्रबन्धक अभिषेक अग्रवाल, सहायक प्रबन्धक जोसेफ आचार्य, कर्मचारीहरू सोनिका राउत र विकास श्रेष्ठलाई पनि निलम्बन गरिएको छ ।
बैंक स्रोतका अनुसार, निक्षेपकर्ताको रकम दुरुपयोग गरी नक्कली ऋण खडा गरेर रकम हिनामिना गरिएको थियो । रकम फिर्ता गर्ने क्रममा रोजीले आफ्ना ससुरा खगेन्द्रप्रसाद रिजालको नाममा रहेको मोरङको रंगेलीस्थित कुल १ बिघा १२ कट्ठा ६ धुर जग्गा बैंकको नाममा रोक्का राखिसकेकी छिन् ।
कँडेल पक्षले असारसम्ममा सबै रकम बुझाउने सहमति भएको र सोही अनुसार करिब ६ करोड बराबरको जग्गा रोक्का गरिएको दाबी गरेको छ । तर, जग्गा हात पारेलगत्तै बैंकले प्रहरीमा उजुरी दिएको भन्दै उनीहरूले बैंकको बदनियत देखिएको बताएका छन् ।
अन्य दुई कर्मचारीले समेत जनही २० लाख रुपैयाँ बैंकमा दाखिला गरिसकेको बुझिएको छ । यो मुद्दा अहिले अदालतमा विचाराधीन रहेको छ ।
