- उपभोक्ताहरूले ग्यास संचित गर्ने प्रवृत्तिले कृत्रिम समस्या तन्किएको भन्दै एलपीजी ग्यास उपलब्ध गराउने निर्णय भएको छ।
- कोशी ग्यासले मासिक २ लाख सिलिन्डर र विराटनगरमा ४० हजार खपत हुँदै आएको तर नियमन आवश्यक रहेको बताएको छ।
- एलपीजी ग्यास विक्रेता संघ मोरङका पूर्व अध्यक्ष गणेश साहले सरकारी निकायको कमजोरी र स्टक गर्दा खतरा बढेको भनेका छन्।
विराटनगर- मोरङका विभिन्न स्थानमा खाना पकाउने ग्यास लिनका लागि डिलरसमक्ष उपभोक्ताहरूको भीड बढ्दै गएको छ । सरकार, ग्यास व्यवसायी र सरोकारवाला निकायबीच बिहीबार भएको छलफलपछि शुक्रबारबाट ग्यास आपूर्ति सहजताका लागि आधा भरिएको ग्यास उपलब्ध गराउने सहमति बनेको छ । यससँगै विराटनगरका विभिन्न ग्यास डिलरसमक्ष बिहानैबाट खाली सिलिन्डरसहित उपभोक्ताहरू पुग्न थालेका छन्। विराटनगर- ११ स्थित राधाकृष्ण ट्रेडर्समा बिहानबाट ग्यास लिनका लागि उपभोक्ताहरूको घुइँचो रहेको थियो ।
कोशी प्रदेशबाट मधेश प्रदेशको सिराहासम्म आपूर्ति दिँदै आएको कोशी ग्यासका प्रबन्धक सचित उपाध्याय भने खाना पकाउने एलपीजी ग्यासको अभाव नभएको स्पष्ट पार्छन् । उनका अनुसार उपभोक्ताहरूले विश्वको वर्तमान परिस्थिति अनुमान गर्दै घरमा ग्यास संचित गर्ने प्रवृत्तिले समस्या भएको हो । उपाध्यायले भने, ‘सरकारसँगै उद्योगी–व्यवसायीहरूले ग्यास आपूर्तिमा सहजता दिने हो । अहिलेसम्म हामीले भित्र्याउँदै आएको भारतीय आयल निगमबाट पूरै कोटाको ग्यास आपूर्ति भइरहेको छ । यहाँ कुनै समस्या छैन । तर उपभोक्ताहरूले हाहाकारका रूपमा घरमा राख्ने प्रवृत्ति बढ्दै गर्दा बजारमा कृत्रिम समस्या देखिएको हो।’
कोशी ग्यासले मात्र आफ्नो क्षेत्र कोशी प्रदेशदेखि मधेश प्रदेशको सिराहासम्म मासिक २ लाख सिलिन्डर उपलब्ध गराउँदै आएको छ । त्यसैगरी, विराटनगरको हकमा प्रत्येक महिना ४० हजारको संख्यामा ग्यास सिलिन्डर खपत हुँदै आएको प्रबन्धक उपाध्यायको भनाइ छ । बजारमा देखिएको समस्या समाधानका लागि नियमन आवश्यक रहेको उनले बताएका छन् । सरकारको सहमति अनुसार शुक्रबारबाट आधा भरिएको ग्यास सिलिन्डर बजारमा पुर्याइनेछ । उनले भने, ‘यतिबेला सामाजिक दायित्व अनुसार सहजताका लागि कम्पनीहरूले काम गरिरहेका छन् । आधा भरिएको ग्यास बजारमा लैजाँदासमेत हामीलाई नोक्सान छ । तर पनि हामी अहिलेको अवस्था हेरेर ग्यास आपूर्ति गर्न तयार छौँ।’
त्यसैगरी, बजारमा देखिएको आपूर्ति समस्यामा सरकारी निकायको कमजोरी रहँदै आएको एलपीजी ग्यास विक्रेता संघ मोरङका पूर्व अध्यक्ष गणेश साह बताउँछन् । एकै घरमा ५ देखि ७ वटासम्म ग्यास संचित गर्ने प्रवृत्ति हटाउन सरकारी निकायदेखि वाणिज्य कार्यालय समेत उदासीन देखिएको उनको आरोप छ । उनले भने, ‘विगतमा नाकाबन्दी हुँदा सरकारी पहलमा ग्यास कम्पनी र ग्यास विक्रेता संघको समन्वयमा कार्ड प्रणाली सुरु गरिएको थियो । त्यसले घरमा जाने ग्यासको लगत राखिन्थ्यो । पछि वाणिज्य कार्यालयले त्यसलाई प्राथमिकतामा राख्न सकेन ।’ जसका कारण अहिले एकै घरमा ५ वटा र त्योभन्दा बढी संख्यामा ग्यास संचित हुन थालेको छ ।
एकै उपभोक्ता लाइन लागेर ठूलो संख्यामा ग्यास लैजाने गरे हुँदा उनीहरूले आफ्नै घरलाई विस्फोटको बिन्दु बनाउँदै लगेको साहको भनाइ छ । उनले भने, ‘ग्यास धेरै स्टक गर्दा समस्या हुन्छ । यसलाई सुरक्षित राख्न नसक्दा वा कतै केही आगजनी हुँदा ग्यासले भयावह अवस्था सिर्जना गर्छ ।’
कोशी ग्याससँग मोरङमा अन्य १० वटा ग्यास कम्पनीले उत्पादन बिक्री वितरण गर्दै आएका छन् । ती ग्यास कम्पनीले विराटनगरस्थित आफ्ना डिलरलाई नियमित रूपमा पठाउनेभन्दा कम ग्यास उपलब्ध गराउँदै आएका छन्। विराटनगरमा सुविधा, त्रिशक्ति, प्रिमा, कन्काई, मेची, रिजाललगायत १० वटा ग्यास कम्पनीको उत्पादन बिक्री वितरण हुँदै आएको छ ।
