- नेपालले कान्स फिल्म फेस्टिभलमा पहिलो पटक औपचारिक सहभागिता जनाउने तयारी गरेको छ।
- नेपाली चलचित्र प्रचारको लागि विशेष स्टलमार्फत फिल्म, पोस्टर र ट्रेलर अन्तर्राष्ट्रिय फिल्म बजारमा प्रस्तुत गरिनेछ।
- यस पहलले नेपाली फिल्मलाई विश्वस्तरिय फिल्म मञ्चमा स्थापित गर्ने ऐतिहासिक अवसरको रूपमा हेरिएको छ।
कान्स फिल्म फेस्टिभलको ७९औँ संस्करणमा नेपालले औपचारिक सहभागिता जनाउने भएको छ। साथै नेपालको स्टलमार्फत फिल्म, पोस्टर, ट्रेलरको प्रचारप्रसार गर्न पाइने भएको छ।
नेपाली फिल्मको अन्तर्राष्ट्रिय प्रवर्द्धन, सहकार्य विस्तार तथा विश्व बजारमा पहुँच विस्तार गर्ने उद्देश्यसहित चलचित्र विकास बोर्डले आगामी मे १२ देखि २३ सम्म फ्रान्सको कान्स शहरमा आयोजना हुने उक्त महोत्सवमा नेपालको प्रतिनिधित्व गर्ने तयारी गरेको हो।
चलचित्र विकास बोर्ड र नेपाल पर्यटन बोर्डको सहकार्यमा नेपालको विशेष ‘नेपाल पवेलियन’ (स्टल-बुथ) पनि रहनेछ। सो स्टलमार्फत नेपाली चलचित्र, फिल्म परियोजना, पोस्टर, ट्रेलर तथा अन्य प्रचार सामग्री अन्तर्राष्ट्रिय फिल्म बजारका वितरक, निर्माता, फिल्म फन्ड, फेस्टिभल प्रतिनिधि तथा दर्शकसमक्ष प्रस्तुत गरिनेछ।
विकास बोर्डका अनुसार कान्स फिल्म फेस्टिभलमा व्यक्तिगत रूपमा सहभागी हुने नेपाली चलचित्रकर्मीहरूले पनि बोर्डको स्टल साझा गरी आफ्नो फिल्म तथा परियोजनाहरू अन्तर्राष्ट्रिय स्तरमा प्रस्तुत गर्न सक्नेछन्, जसले नेपाली चलचित्रलाई विश्व फिल्म बजारसँग जोड्ने महत्वपूर्ण अवसर सिर्जना गर्ने अपेक्षा गरिएको छ।
बोर्डले यस पहललाई नेपाली फिल्म उद्योगलाई विश्व फिल्म मञ्चमा स्थापित गर्ने ऐतिहासिक अवसरका रूपमा लिएको जनाएको छ।
कान्स महोत्सवमा सहभागी हुन इच्छुक नेपाली चलचित्रकर्मीहरूलाई बोर्डसँग समन्वय गरी आफ्नो सामग्री प्रदर्शन गर्न अनुरोध गरिएको छ।
