- कैलालीमा प्रतिनिधिसभा निर्वाचनका लागि मतदान केन्द्र व्यवस्थापन, सामग्री ढुवानी र सुरक्षा तयारी पूरा भएको छ।
- नेपाल प्रहरी, सशस्त्र प्रहरी बल र नेपाली सेनासहित सुरक्षा कडाइ गरिएको र विशेष योजना लागू गरिएको छ।
- मतदान केन्द्रहरूमा भौतिक संरचना तथा विशेष सुविधासहित मतदान प्रक्रिया सुचारु गर्न सबै कर्मचारी खटाइसकिएका छन्।
धनगढी- भोलि फागुन २१ गते हुन गइरहेको प्रतिनिधिसभा निर्वाचनका लागि कैलालीमा आवश्यक सम्पूर्ण तयारी पूरा भएको छ। आज सबै मतदान केन्द्रमा कर्मचारी खटिएर मतदान केन्द्र निर्माण गरिँदैछ।
जिल्ला निर्वाचन कार्यालय कैलालीका अनुसार मतदान केन्द्रको व्यवस्थापन, मतदान सामग्री ढुवानी तथा सुरक्षाको प्रबन्ध मिलाइसकिएको छ।
जिल्लाभरिका सबै मतदान केन्द्रमा कर्मचारी खटाइसकिएको र आवश्यक मतदान सामग्री सम्बन्धित केन्द्रमा पुर्याइएको कार्यालयले जनाएको छ। मतपेटिका, मतपत्र, छाप, मतदाता नामावली लगायतका सामग्री सुरक्षित रूपमा केन्द्रसम्म पुर्याइएको छ।
सुरक्षा व्यवस्थालाई समेत कडाइ गरिएको छ। नेपाल प्रहरी, सशस्त्र प्रहरी बल र आवश्यक स्थानमा नेपाली सेनासमेत परिचालन गरिएको छ। संवेदनशील र अति संवेदनशील मतदान केन्द्रमा विशेष सुरक्षा योजना लागू गरिएको कैलालीका प्रमुख जिल्ला अधिकारीले बताएका छन्।
मतदान केन्द्रको भौतिक संरचना, लाइन व्यवस्थापन, अपांगता भएका व्यक्तिका लागि सहज पहुँच तथा महिला र ज्येष्ठ नागरिकलाई प्राथमिकता दिने व्यवस्था अनुसार लाइन निर्माण गरिँदैछ। निर्वाचन कार्यालयले मतदातालाई तोकिएको समयभित्र मतदान केन्द्रमा उपस्थित भई आफ्नो मताधिकार प्रयोग गर्न अनुरोध गरेको छ।
भोलि अर्थात फागुन २१ गते बिहान ७ बजेदेखि साँझ ५ बजेसम्म मतदान हुनेछ।
