काठमाडौँ— वसन्त ऋतुको आगमनसँगै काठमाडौँ उपत्यकाको दृश्य फेरिएको छ। विशेषगरी काठमाडौँको लैनचौर, सिनामंगल र भृकुटीमाण्डप क्षेत्रका सडक किनारा र पार्कहरूमा ढकमक्क चेरीका फूलहरू फुल्न थालेपछि शहरको सुन्दरतामा नयाँ चमक थपिएको हो।
पछिल्लो समय काठमाडौँ महानगरपालिकाले शहरी सौन्दर्यकरण अभियान अन्तर्गत विभिन्न मुख्य सडकका किनारा र सार्वजनिक पार्कहरूमा चेरीका बिरुवाहरू रोपेको थियो। ती बिरुवाहरू अहिले बयस्क भई फूल फुल्न थालेपछि राजधानीका सडकहरू गुलाबी र सेतो रङ्गले सजिएका देखिन्छन्। यसले धूलो र कोलाहलका बीच पनि उपत्यकाबासीलाई प्रकृतिको आनन्द महसुस गराएको छ।
चेरी फुल्न थालेसँगै ती स्थानहरूमा सर्वसाधारणको आकर्षण ह्वात्तै बढेको छ। विशेषगरी युवापुस्ता र पर्यटकहरू फुल्दै गरेका चेरीका फूलहरूसँग सेल्फी खिच्न, टिकटक बनाउन र तस्बिर लिन व्यस्त देखिन्छन्। सामाजिक सञ्जालमा समेत यतिबेला काठमाडौँका यी दृश्यहरू भाइरल भइरहेका छन्।
जापानको राष्ट्रिय फूलका रूपमा प्रसिद्ध रहेको चेरी (साकुरा) ले काठमाडौँको शहरी वातावरणलाई शान्त र आकर्षक बनाउन मद्दत गरेको छ। महानगरले शहरी सुन्दरताका लागि चालेको यो कदमको स्थानीय स्तरमा प्रशंसा भइरहेको छ।
तस्बिरहरू:
