हुम्ला– चार हजार दुई सय मिटर उचाईमा अवस्थित नाम्खा गाउँपालिका– ६ को हिमालपारीको गाउँ लिमीको स्वास्थ्य चौकीका स्वास्थ्यकर्मीहरुले गुम्वामा बसेका भिक्षुहरुको सम्वन्धित स्थलमा पुगेर स्वास्थ्य उपचार गरेका छन्। लामा बसाल्ने, आम्ची र जडिबुटीबाट उपचार गर्दै आउनु भएका गुम्वामा ज्ञान लिदै आएका भिक्षुहरुको स्वास्थ्यकर्मी सो स्थान मै पुगेपछि सहज रुपमा उपचार गरेका हुन्।
प्राकृतिक बन्दाबन्दीमा रहेको लिमीको छेवखोर्चे गुम्वामा लामा, पुजाआजा र ज्ञान सिक्दै आएका भिक्षुहरुको स्वास्थ्य जाँचका साथै उपचार गर्ने कार्य भएको लिमी स्वास्थ्य चौकीका संयोजक लोकेस बोहराले बताए।
स्वास्थकर्मीहरुले बदलिँदो मौसमको कारण रुघाखोकी, झाडापखला, ज्वरो, दम, श्वासप्रश्वास, घुडा दुख्ने लगाएतका बिरामीको उपचार गरेका हुन्। स्वास्थ्यकर्मीहरु स्वास्थ्य चौकी रहेको हल्जी गाउँवाट साँढे दुई घण्टा पैदल हिडेर सो गुम्वामा पुगेर लामा सहित १६ जना भिक्षुहरुको उपचार गरिएको उनले बताउनुभयो। त्यसका लागि दुई जना स्वास्थ्यकर्मी र एक जना कार्यालय सहयोगीको टोली औषधिसहित गुम्बामा पुगेको थियो।
