दाङ- देउखुरीको कालाकाटे क्षेत्रमा टिप्पर र अटो ठोक्किएर दुर्घटना हुँदा एक जनाको मृत्यु भएको छ।
मृत्यु हुनेमा गढवा गाउँपालिका- १, कालाकाटे निवासी ३६ वर्षीय जोरकुमार पुन रहेको जिल्ला प्रहरी कार्यालय दाङले जनाएको छ।
प्रहरीका अनुसार बिहान भालुवाङबाट कालाकाटेतर्फ जाँदै गरेको ना ८ ख ३२६४ नम्बरको टिप्पर र कालाकाटेबाट भालुवाङतर्फ आउँदै गरेको रा १ ह ७३५५ नम्बरको अटो आपसमा ठोक्किएका हुन्।
दुर्घटनामा गम्भीर घाइते भएका अटो चालक पुनलाई उपचारका लागि भालुवाङ अस्पताल लगिएकोमा उपचारकै क्रममा उनको मृत्यु भएको प्रहरीले जनाएको छ। मृतक पुनको शव हाल भालुवाङ अस्पतालमा राखिएको छ।
दुर्घटनामा संलग्न टिप्पर र चालकलाई इलाका प्रहरी कार्यालय गढवाले नियन्त्रणमा लिएको प्रहरी निरीक्षक डबलबहादुर बमले जानकारी दिएका छन्।
अटोमा विद्यालय जान लागेका पाँच जना विद्यार्थी सवार रहेको र उनीहरू सामान्य घाइते भएको प्रहरीले जनाएको छ।
घटनाको थप अनुसन्धान भइरहेको प्रहरीले बताएको छ।
