बिराटनगर- मोरङको रंगेली नगरपालिकामा पारिवारिक विवादले उग्र रूप लिँदा एक दम्पत्तीको मृत्यु भएको छ।
जिल्ला प्रहरी कार्यालय मोरङका अनुसार रंगेली नगरपालिका वडा नं. ५ बहुवनका मुकेशकुमार मण्डलले धनपट्टीस्थित ससुराली घर पुगेर २१ वर्षीया श्रीमती अम्बिकाकुमारी मण्डलको हत्या गरेका हुन्।
मंगलबार बिहान करिब पौने तीन बजे मुकेशले श्रीमतीमाथि कुटपिट गर्दै चक्कु प्रहार गरी हत्या गरेको प्रारम्भिक अनुसन्धानले देखाएको छ।
श्रीमतीको हत्या गरिसकेपछि मुकेशले सोही चक्कुले आफ्नो घाँटी रेटेर आत्महत्या गरेको प्रहरीले जनाएको छ। सोमबार बेलुका नै ससुराली पुगेका मुकेश र अम्बिकाबीच आपसी विवाद बढ्दै गएपछि यो बीभत्स घटना घटेको हो।
घटनास्थलमा अम्बिकाको मृत्यु भएलगत्तै मुकेशले आफ्नै घाँटी रेटेको अवस्थामा दुवैको शव फेला परेको प्रहरी नायब उपरीक्षक (डीएसपी) लीलाराज लामिछानेले जानकारी दिए।
प्रहरीले घटनाको थप कारण र विस्तृत विवरण संकलन गरिरहेको छ।
