- नेपालका सात वरिष्ठ साहित्यकार र पत्रकारलाई भारतको लखनउमा ‘बज्म ए पैकर हापुडी लखनउ’ संस्थाको कार्यक्रमद्वारा सम्मान गरियो।
- सम्मानित व्यक्तिहरुलाई सम्मान पत्र, पदक र भारतीय झण्डाको प्रतीक प्रदान गरी सम्मान गरिएको थियो।
- विभिन्न महिला र विशेष अतिथिहरुको उपस्थिति रहेको उक्त कार्यक्रममा ४० बढी साहित्यकारले आ–आफ्नो रचना वाचन गरे।
हुम्ला– नेपालका सात जना वरिष्ठ साहित्यकार र पत्रकारलाई भारतको लखनउमा सम्मान गरिएको छ। ‘बज्म ए पैकर हापुडी लखनउ’ नामक संस्थाले भारत उत्तर प्रदेशको राजधानी लखनउमा आइतबार आयोजना गरेको अन्तर्राष्ट्रिय मुशायरा, कवि सम्मेलन र स्रष्टा सम्मान कार्यक्रममा उनीहरुलार्ई सम्मान गरिएको हो।
सम्मानित हुनेमा बाँकेका वरिष्ठ साहित्यकार प्रगतिशील लेखक सङ्घ नेपालका केन्द्रीय सचिव डा. हरिप्रसाद तिमिल्सिना, भेरी साहित्य समाजका केन्द्रीय कोषाध्यक्ष डा. राजकुमार थारू, हाम्रो पूर्णिमा साहित्य प्रतिष्ठानका अध्यक्ष डा. पुष्कर रिजाल, कल्पना फाउन्डेसनका कल्पना पौडेल जिज्ञासु र ऋषिराम सापकोटा तथा पूर्णतारा फाउन्डेसनकी अध्यक्ष तारा रोकाया छन्।
‘बज्म ए पैकर हापुडी लखनउ’ का संस्थापक अतिक कासगन्जवी, भारतीय सांस्कृतिक सहयोग एवम् मैत्री सङ्घ उत्तर प्रदेशका अध्यक्ष शारिक रब्बानी र प्रमुख अतिथि लेखक सङ्घ नेपालका केन्द्रीय सचिव डा. हरिप्रसाद तिमिल्सिनाले सम्मानितहरुलाई सम्मान पत्र, पदक र भारतीय झण्डाको प्रतीक प्रदान गरेर सम्मान गरेका थिए।
सो अवसरमा केन्द्रीय सचिव डा. तिमिल्सिनाले नेपाल र भारतको सम्बन्धलाई जनस्तरबाट झन् प्रगाढ बनाउन दुबै देशका साहित्यकारहरु निरन्तर क्रियाशील रहेको बताए।
केही समयमै नेपालमा पनि कार्यक्रम राखेर भारतीय साहित्यकाहरुको सम्मान गरिने बताए। कार्यक्रममा भारतीय सांस्कृतिक सहयोग एवं मैत्री सङ्घ उत्तर प्रदेशका अध्यक्ष शारिक रब्बानीले नेपाल भारतको सम्बन्धलाई साहित्य र संस्कृतिले झनै प्रगाढ बनाउँदै लगेको बताए ।सो अवसरमा नेपाल र भारतका विभिन्न ठाउँबाट कार्यक्रममा सहभागी भएका ४० बढी साहित्यकार, शायर र कविले आ–आफ्नो रचना वाचन गरेका थिए। कार्यक्रममा मिसेज युनिभर्स २०१९ डा. निमा पन्त, बज्म ए पैकर हापुडी लखनउ की अध्यक्ष डा. कुसुम चौधरी र रुबरु फाउन्डेसनका संस्थापक अध्यक्ष इरशाद राहीको विशेष उपस्थिति थियो। कार्यक्रममा सम्मानित भएका वरिष्ठ साहित्यकार र पत्रकारहरुलाई ‘शरार बिलरामी सम्मान’ र ‘डा. इबरत सम्मान’ बाट सम्मानित गरिएको थियो।
