नेपालको वर्तमान अवस्था जर्जर छ। भ्रष्टाचार, जवाफदेहीविहीन शासन, विदेशी हस्तक्षेप तथा युवाको उदासीनता मुख्य रूपमा अहिलेको परिस्थितिका लागि जिम्मेवार छ।
यस्तो अवस्थामा अहिलेको भाषामा ‘जेन-जी’ मानिने सचेत र युवापुस्ताले मुख्यतया: भ्रष्ट र भ्रष्टाचारलाई निशाना बनाई गर्न लागेको आन्दोलनले आशा पलाएको छ।
युवा आफ्नै भविष्य र राष्ट्रको भविष्यबारे सचेत हुनु र आन्दोलनमा उत्रनु स्वागतयोग्य मानिनु पर्छ। तर, त्यसमा केही सावधानी अत्यावश्यक हुन्छ।
आन्दोलनमा विदेशी र बाह्य स्वार्थको घुसपैठले मुलुकको गति र गन्तव्य नेपालको स्वार्थबाट टाढिन्छ। २०६२–६३ मा आन्दोलन जनताले गरे। राजाले त्यसलाई सकारात्मक रुपमा लिए। तर, विदेशी हस्तक्षेप र घुसपैठले राजनीतिक एजेण्डा लादे। परिणाम हामीले अहिले देखिरहेका छौँ।
जेन-जी आन्दोलनमा भ्रष्टाचार र त्यसबाट फाइदा लिएकाहरू निशाना भए पनि यस आन्दोलनले भ्रष्टाचारलाई निरुत्साहित गर्नुका साथ विगत २० वर्षको पारदर्शी भ्रष्टाचारका नायक या खलनायकहरूलाई कानुनको घेरामा ल्याउन र सत्ताबाट हटाउने भूमिका खेल्नु आवश्यक छ।
तर, सबैभन्दा महत्त्वपूर्ण- बाह्य गुरु, बाह्य शक्ति र बाह्य स्वार्थको छायाँबाट यो आन्दोलन मुक्त हुनु जरुरी छ। नेतृत्वको आन्दोलनमाथि नियन्त्रण नभए र त्यसमा विदेशी प्रभाव रहेमा देशको सार्वभौमसत्तालाई त्यसले खतरा पुर्याउने छ।
०६३ मा बाहिरबाट लादिएका एजेन्डा र त्यसपछि देखा परेका विचलनका समीक्षा र कोर्स कनेक्सन आजको आवश्यकता हो। यो खबरदारीसँगै युवाहरूमा राष्ट्रप्रति सचेत समर्पण देखिनु निश्चय नै सुखद संकेत हो।
