जनकपुरधाम – असारमा आएको भारी वर्षाको कारण विस्थापित भएका जनकपुरका केही व्यक्तिहरु अहिले पनि आफ्नो घरमा फर्कन सकेका छैनन् । कोही आफन्तको घरमा आश्रय लिएर बसिरहेका छन् भने अधिकांशको बसोबास विद्यालयमा रहेको छ ।
जनकपुरधाम उपमहानगरपालिका–२४ बसहिया कायस्थ टोलमा घर भएकी शेलो मण्डलले बाढीले घर बगाएपछि विद्यालयमा बसिरहेको र अहिलेसम्म घर फर्कन नसकेको बताइन् ।
उनी राष्ट्रिय प्राथमिक विद्यालयको एउटा कक्षा कोठामा परिवार र गाई बाख्रासहित बसोबास गरिरहेकी छन् । बाढी पीडितहरु विद्यालयमा बसेपछि विद्यालयको पढाई प्रभावित बनेको छ ।
असार अन्तिम साता आएको वर्षाले शेलु मण्डलको घर भत्केपछि उनको परिवार बिचल्लीमा परेको हो । घरबार बिहिन भएको करिब तीन महिना भईसकेपनि पुनस्र्थापनामा कसैले सहयोग नगर्दा उनको परिवारको विद्यालय बसाई लम्बिएको हो ।
राहतको नाममा केही प्याकेट चाउचाउ बाहेक केही नपाएको उनले बताइन् । ‘राहतको नाउमा चाउचाउ बाहेक केही पाउन सकेका छैनाैँ । घर बनाउन पैसा छैन, कहाँ जाने?’ शेलुले भनिन् ।
‘छोराको कमाईले खान पनि पुग्दैन् । कहीलेकाहीँ भोकै सुत्नुपर्छ । फेरि बालबच्चादेखि हामी सबै बेलाबेलामा बिरामी परिरहेका हुन्छौँ,’ सेलुले पीडा सुनाइन् । उनको बुहारी मिथिलेश देवी ६ महिनाकी गर्भवती छन् ।
पैसा र ठाउँ अभावले बस्नै गाह्रो परेको उनको परिवारलाई बच्चाको डेलिभरी कहाँ गराउने चिन्ताले सताएको छ । सहयोेगी हातलाई कुर्दै उनी विद्यालयमा बसिरहेकी छन् ।
