जनकपुरधाम – प्रदेश नम्बर २ को प्रदेशसभाको पहिलो बैठकमा शहीदको तस्बिर नराखेको भन्दै विवाद भएको छ । विवादका कारण बैठक केहीबेर अवरुद्ध भएको छ ।
प्रदेश २ को प्रदेशसभाको पहिलो बैठकमा मधेस आन्दोलनका शहीदको फोटो नराखिएको प्रति सदस्यले हल्ला मचाउँदा बैठक केही बेर अवरुद्ध भयो ।
बैठक सुरु हुनासाथ राजपाका सांसदले मधेस आन्दोलनका शहीदका तस्बिर नराखेको भन्दै आपत्ति जनाउँदै प्रदेशसभाको बैठक अवरुद्ध गरेका थिए । पहिलो बैठक सुरु हुनासाथ राजपा सांसद मनिष सुमनले मधेस आन्दोलनका शहीदको फोटो राख्न माग गर्दै विरोध गरेका थिए ।
‘सभामुखको आसन अगाडि जनआन्दोलनका शहीदको तस्बिर राखिएको छ तर त्यहाँ मधेस आन्दोलनका सहिदको तस्बिर किन राखिएन’ भन्दै सुमनले आपत्ति जनाए ।
लगत्तै राजपा सांसद डिम्पल झाले मधेसका सहिदको तस्वीर नराखेसम्म बैठक अघि नबढ्ने बताएछि सदस्यहरु आआफ्नो स्थानबाट उठे ।
एमाले र मधेस केन्द्रित दलको वेग्लावेग्लै विरोधले संसद बैठकको प्रारम्भमै हंगामा हुने संकेत दियो ।
तर जेष्ठ सदस्यको हैसियतमा सभा चलाइरहेका ललन चौधरीले अर्को बैठकमा मधेस आन्दोलनका शहीदको तस्बिर राख्न रुलिङ गरे । योसँगै मधेस केन्द्रित दलहरु बैठक अघि बढ्न दिन तयार भए ।
