काठमाडौं – आइतबार चारवटा प्रदेशसभाको पहिलो बैठक बस्दैछ । प्रदेश नम्बर २, ५, ६ र ७ आइतबार प्रदेशसभाको पहिलो बैठक बस्न लागेको हो । यसअघि गएको बिहीबार प्रदेश नम्बर ३ को पहिलो प्रदेशसभा बैठक बसेको थियो । प्रदेश नम्बर ४ र ७ सोमबार अधिवेशन सुरु हुँदैछ ।
नेपालमा संसदीय व्यवस्था पुरानो भए पनि संघात्मक ढाँचाको संसदको अभ्यास भने पहिलोपटक हुँदैछ । संविधान अनुसार संघीय संसद, एक प्रदेशसभा र अर्को प्रदेशसभा स्वतन्त्र छन् । तर पनि बैठक सञ्चालन भने एउटै शैली र कार्यविधिबाट हुने भएको छ ।
प्रदेशसभा बैठकको सञ्चालनको सम्पूर्ण तयारी गर्ने जिम्मा सरकारको भए पनि अन्तिम समयमा संघीय संसद सचिवालयलाई सहयोगका लागि आग्रह गरेको थिया ।
सरकारको आग्रहपछि संसद सचिवालयले सातवटै प्रदेशसभाको बैठक सञ्चालनको शैली, कार्यसूचि र अन्तरिक कार्यविधि एउटै हुने गरी व्यवस्था मिलाएको छ । सबै प्रदेशको पहिलो बैठकले अन्तरिम कार्यविधिलाई स्वीकृति दिनेछ ।
